奇想

三兩日升二三千點，活在當下，真好。　這種奇景，如黃興桂話齋：有今生，無來世。

小弟作為大淡友，輸錢事小，條氣唔順事大。　就這星期觀察所得，心中有幾個「謎」：
1. 為何出現「大奇蹟日」後，股市再狂升三千點？
2. 為何「大奇蹟日」後，任總個樣咁愁？
3. 為何上星期四港元會離奇上升至破 7.8?

頭先坐巴士，終於諗到o的野。

假設有大鱷一早知道伯南克減貼現窗利率，又知道次按單野死實，佢會點做？

1. 在伯南克宣佈減貼現窗利率前一刻瘋狂入貨，因為個市會有短暫支持。
2. 各大行冇水，要大平賣套現，個市任人魚肉，大鱷出擊良機。
2. 因為次按第二波必爆，必盡快托市，托到所有散戶或圖表派唔入市唔安樂，跟住就大派特派。
3. 香港是世界上資金流動最自由的地方，消息流通速度及散戶投入程度俱屬世界之冠，加上聯繫匯率基制，國際炒家之外匯風險近乎零，故是國際大鱷最佳獵食地點。
4. 順手上演一幕量子基金翻版，沖擊聯匯。　依現時基制，只要夠多錢，聯匯是可以沖擊的。

如是者，先上演一幕「大奇蹟日」（當晚伯南克減貼現窗利率），再藉外圍消息狂炒，加上中央那個資金自由行計劃咁o岩同時出籠，狗屎撞馬棍好彩到唔恨，散戶星期一唔中，星期二三都中硬招。　星期三見成交轉弱，今日即時再藉好消息隊高七百點出貨。　圖表派見大升市加上大成交配合聽日又再入貨，結果人家賺盡離場，再狂空期指。

醜婦終須見家翁，法巴解凍基金必定大貶值，成交價一出個市即時仆直，到時大鱷的期指平倉賺第二浸，應該夠本錢同任總鍊過。

如果你係任總，就算明知人家出招，亦只能啞子吃黃蓮，難怪失魂落魄，苦無對策。

只是，誰是這大鱷丁蟹？

The Perfect Storm

繼上日大時代式反彈後，港股今日再升千二點。　天津將容許個人投資者買港股，一眾股民喜氣洋溢是也。

不過，股市由高位二萬三千八回落至一萬九千二，升回六成跌幅補裂口非常合理。

正當大家以為雨過天青之際，一個金融界perfect storm 已近在眉睫。

次按衍生的問題根本未解決，
散戶今日被昆入市，
天不怕地不怕只怕無股炒的國內股民加入戰團，
加埋慢半拍先生伯南克，
今次真係．．．　唔係凍檸賓．．．　想唔死都幾難。